Մի կին երազում տեսավ՝ իբր խանութի վաճառասեղանի հետեւում ինքը՝ Տեր Աստված էր կանգնած:
-Տե՛ր Աստված, այդ դու ե՞ս,- ուրախությամբ բացականչեց կինը:
— Այո՛, ես եմ,- պատասխանեց Աստված:
-Իսկ ի՞նչ կարելի է գնել քեզանից,- հարցրեց կինը:
-ինձանից կարելի է գնել ամեն ինչ,- եղավ պատասխանը:
-Այդ դեպքում տու՛ր ինձ, խնդրում եմ, առողջություն, երջանկություն, սեր, հաջողություն եւ շատ դրամ:
Աստված բարյացակամորեն ժպտաց եւ պատվիրված ապրանքները բերելու համար գնաց դեպի օժանդակ կառույցը: Որոշ ժամանակ անց նա վերադարձավ թղթե փոքրիկ տուփով:
-Ամբողջը դա՞ է,- բացականչեց զարմացած ու հիասթափված կինը:
-Այո՛, ամբողջը սա է,- պատասխանեց Աստված: -Մի՞թե դու չգիտեիր, որ իմ խանութում միայն սերմեր են վաճառվում:
Սիրելի’ երիտասարդ
Առաջիկա օրերին «ՄԱՆԱՆԱ» ծրագրի շրջանակներում դու կարող ես մասնակցել հետևյալ հանդիպումներին և քեզ հետաքրքրող հարցերի պատասխանները գտնել Հայ Առաքելական Սուրբ Եկեղեցու հոգևորականների օգնությամբ:
Ապրիլ 29, ուրբաթ, ժամը 18:30
Երևանի Սուրբ Զորավոր Աստվածածին եկեղեցի
թեման` ԵՐՋԱՆԿՈՒԹՅՈՒՆ
բանախոս` Արսեն սարկավագ Զոհրաբյան
Մայիս 1, կիրակի, ժամը 14:30
Մալաթիայի Սուրբ Աստվածածին եկեղեցուն կից սրահ
թեման` ՍՈՒՐԲ ՀԱՐՈՒԹՅԱՆ ԽՈՐՀՈՒՐԴԸ
բանախոս` Տ. Ասողիկ քահանա Կարապետյան
Մայիս 1, կիրակի, ժամը 14:30
Արգավանդի Սուրբ Սարգիս եկեղեցու երիցատուն
թեման` ԱՊԱՇԽԱՐՈՒԹՅԱՆ ԽՈՐՀՈՒՐԴԸ
բանախոս` Գևորգ սարկավագ Ալավերդյան
Մայիս 1, կիրակի, ժամը 15:00
Նոր Նորքի Սուրբ Սարգիս եկեղեցու երիցատուն
ՀՈԳԵՎՈՐ ԲՈՎԱՆԴԱԿՈՒԹՅԱՄԲ ՖԻԼՄԻ ԴԻՏՈՒՄ
Մայիս 3, երեքշաբթի, ժամը 18:30
Երևանի Սուրբ Գրիգոր Լուսավորիչ Մայր եկեղեցի
թեման` ԷՖԹԱՆԱԶԻԱ ԿԱՄ «ԲԱՐԻ» ՄԱՀ
բանախոս` Ժորա սարկավագ Սարգսյան
Տեղեկացնենք նաև, որ յուրաքանչյուր շաբաթ, ժամը 15:00-ին Օշականի Ս. Մեսրոպ Մաշտոց եկեղեցու կից սրահում ևս կարող ես մասնակցել «ՄԱՆԱՆԱ» ծրագրի քննարկումներին, իսկ ամեն ուրբաթ, ժամը 16:00-ին ծանոթանալ Մարկոսի ավետարանի մեկնությանը Էջմիածնի Սուրբ Հռիփսիմե վանքում:
Լրացուցիչ տեղեկությունների համար գրի’ր մեզ, կամ պարզապես միացիր Ֆեյսբուքի մեր խմբին` ՄԱՆԱՆԱ ծրագիր
Ամեն տարի` ապրիլի 24-ին, հայ ժողովուրդը Հայաստանում և աշխարհի տարբեր երկրներում նշում է Հայոց Ցեղասպանության բյուրավոր զոհերի հիշատակի օրը: Լեհաստանում բնակվող հայերը ևս անմասն չմնացին համազգային այդ իրադարձությունից: Երթը, որին մասնակցում էին հատկապես Վարշավաբնակ հայերը, կազմակերպվել էր Հայ Առաքելական Սուրբ Եկեղեցու լեհահայոց հոգևոր հովիվ Տ. Տաճատ աբեղա
Ծատուրյանի նախաձեռնությամբ և վարշավաբնակ Էդգար Բրոյանի օժանդակությամբ:
Այս տարի Հիսուս Քրիստոսի Հարության տոնը համընկել է Հայոց Եղեռնի օրվան` ապրիլի 24-ին: Ուստի, Հայոց Ցեղասպանության 96-րդ տարելիցին նվիրված երթը Վարշավայում տեղի է ունեցել ապրիլի 22-ին` Հիսուս Քրիստոսի Խաչելության և կենարար Մահվան օրը:
Հայր Տաճատի հրավերին ընդառաջ` երթին իրենց մասնակցությունն են բերել նաև Լեհաստանում հայ կաթոլիկ երեք եկեղեցիները ներկայացնող հովիվներից երկուսը` Հայր Թադեոս Իսակևիչ-Զալևսկին` Գլիվիցեից, և Հայր Արթուր Ավդալյանը` Վարշավայից:
Երթն ավարտվել է Թուրքիայի դեսպանատան առջև, որտեղ տեղի է ունեցել
Հոգեհանգստյան կարգ` Ցեղասպանության զոհ դարձած հայոց հոգիների խաղաղության համար: Այնուհետև օրվա խորհրդի հետ կապված հնչել են խոսքեր Հայր Տաճատ Ծատուրյանի, Հայր Թադեոս Իսակևիչ-Զալևսկու և Ռաֆիկ Ամիրյանի կողմից:
Հավարտ վերոհիշյալ արարողության հայ ժողովուրդն իր գրավոր բողոքն է թողել Թուրքիայի դեսպանատան փոստարկղում:
Իսկ կիրակի օրը` ապրիլի 24-ին, ժամը 12:00-ին, Լեհաստանում Հայաստանի Հանրապետության դեսպանատանը տեղադրված Խաչքարի առջև տեղի է ունեցել Հոգեհանգստյան կարգ 20-րդ դարասկզբին Արևմտյան Հայաստանում ցեղասպանության զոհ դարձած հայոց հոգիների խաղաղության համար: Նույն օրը` ապրիլի 24-ին, ժամը 14:00-ին, Վարշավայի Ամենասուրբ Աստվածածնի Ննջման եկեղեցում Լեհահայոց
հոգևոր հովիվ Տ. Տաճատ աբեղա Ծատուրյանի ձեռամբ մատուցվել է Սուրբ Պատարագ Հիսուս Քրիստոսի Հրաշափառ Հարության տոնի առիթով:
Եկեղեցին լեցուն էր հայ և օտար հավատացյալներով: Ի զարմանս ներկաների, Լեհաստանում առաջին անգամ հնչեց Կոմիտասյան քառաձայն Պատարագ, որը կատարում էին ազգությամբ լեհ երիտասարդներ: Հայր Տաճատի խրախուսանքի և Վարշավաբնակ Յակուբ Կոպչինսկու ջանքերի շնորհիվ երիտասարդները կարողացել էին հրաշալի պատրաստվել զատկական Պատարագին:
Աստվածային նախախնամությամբ տարվույս ապրիլի 24-ը, որը միավորել էր Հայոց Ցեղասպանության հիշատակի օրը և Տիրոջ Հրաշափառ Հարության տոնը, Վարշավայում դրեց հիմքը Կոմիտասյան անկրկնելի Պատարագի:
Ապրիլի 24-ին, Քրիստոսի Սուրբ Յարութեան տօնին առիթով Ցյուրիխի Տիւպէնտօրֆ
գիւղաքաղաքի Հռովմէական Ս.Մարիամ Աստուածածին եկեղեցւոյ մէջ մատուցուեցաւ
հայածէս Ս. Պատարագ իսկ Ս. Պատարագի աւարտին կատարուեցաւ Հոգեհանգստեան Պաշտօն Հայոց Ցեղասպանութեան 96.ամեակի անմեղ զոհերի յիշատակին:
Զատկական Սուրբ Պատարագը մատոյց Զուիցերիոյ Հայոց Թեմի Առաջնորդական Տեղապահ եւ Ժնևի Ս. Յակոբ Առաջնորդանիստ Եկեղեցւոյ Հոգեւոր Հովիւ նորանշանակ Տ. Մեսրոպ Վարդապետ Պարսամեանը, առընթերակայ ունենալով Ցյուրիխի Հոգեւոր Հովիւ Տ. Շնորհք Քահանայ Չէքիճեանը իսկ Ս. Սեղանին սպասարկեցին ուրարակիր դպիրներ ու դպիրներ:
Տաղաւարի սոյն Պատարագին ներկայ էին Ցյուրիխի ու Նէօշաթէլի Եկեղեցական Խորհուրդի անդամները գլխաւորութեամբ Ատենապետեր Տիարք Վռամշապուհ Թերզիեանի ու Ալէն Ուկնատի: Այս տարուան Զատկական Ս. Պատարագը աննախընթաց էր իր աւելի քան երկու հարիւր հայ հաւատացեալներու ներկայութեամբ, որոնք պիտի ծանօթանային ու Բարի Գալուստ մաղթէին Զուիցերիոյ Թեմի իրենց նորանշանակ Առաջնորդական Տեղապահ Հայր Սուրբին յանձին Հոգշ. Տ. Մեսրոպ Վարդապետ Պարսամեանի:
Սուրբ Պատարագի աւարտին Հայր Սուրբը ներկաներուն փոխանցեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնութիւնն ու Ս. Յարութեան Տօնի պատգամը որմէ յետոյ կատարուեցաւ նաեւ Հոգեհանգստեան յատուկ կարգ ի յիշատակ Մեծ Եղեռնի աւելի քան մէկ ու կէս միլիոն նահատակներուն:
Հայոց Ցեղասպանութեան 96. տարելիցի ոգեկոչման արարողութեան առթիւ ուղերձով մը հանդէս եկաւ նաեւ Զուիցերիա-Հայաստան Ընկերակցութեան Խորհուրդի անդամներէն Պրն. Անտրէաս Տրայզիպնըրը ով արձագանգ եղաւ Զուիցերիոյ ժողովուրդի Հայոց Ցեղասպանութեան հանդէպ դրսեւորաց դիւրազգացութեանը ու կիսեց հայ ժողովուրդի վիշտն ու ցաւը:
Ս. Պատարագի աւարտին եկեղեցւոյ յարակից սրահին մէջ տիկնանց յանձնախումբին կողմէ խնամքով պատրաստուած էր Զատկական հիւրասիրութիւն` «Սիրոյ Սեղան», որու ընթացքին Հոգշ. Հայր Սուրբին ցուցադրուած մտերմիկ ու ջերմ ընդունելութիւնը այդպիսի մթնոլորտ մը կը պարզէր որ կարծէք նորանշանակ Հայր Սուրբը երկար ժամանակէ ի վեր արդէն բոլորին ծանօթ էր եւ կը գտնուէր իր հարազատ յարկին մէջ:
Տիրոջ Հրաշափառ Ս. Յարութեան Տօնը Ցյուրիխի մէջ իր ետին ահաւասիկ այսպիսի
անմոռանալի օր մը կը թողուր:
ՎԻԺԵՑՈՒՄԸ ՈՃԻՐ Է ՈՐՈՎԱՅՆՈՒՄ: Երեխան Աստծո նվեր է: եթե չեք ուզում նրան, ի’նձ տվեք: (Մայր Թերեզա)
ՀՀ պաշտոնական վիճակագրության համաձայն, 2009-ին Հայաստանում գրանցվել է 10.149 հղիության արհեստական ընդհատման դեպք: Ես համացանցից չկարողացա գտնել 2010-ի տվյալները:
Կարծում եմ, ցավով ու կսկիծով Մեծ Եղեռնի մասին խոսելիս, չպետք է մոռանանլ նաև այս յուրօրինակ ԵՂԵՌՆԻ մասին, երբ մայրերը սպանում են իրենց զավակներին:
Հղիության արհեստական ընդհատման դիմելու համար պատճառները բազմաբնույթ են լինում, սակայն անկախ պատճառից, ոչինչ չի կարող արդարացնել իրենց դեռևս չծնված մանուկներին սպանող «ծնողներին»: Մեր շրջապատում էլ կան մայրանալու պատրաստվող երիտասարդ կանայք, որոնք իրենց սրտի տակ ապրող Աստծո հրաշքը համարում են «անցանկալի»: Իսկ 20.000 դրամը բավական է բժշկական միջամտությամբ վերջակետ դնելու այս ամենին…
Ստորև, առանց մեկնաբանության, ներկայացնում եմ «Էթիկական երկու հարց», ըստ Հրաչյա Ամիրյանի «Ապրելու Արվեստը» գրքի:
Դուք ճանաչում եք մի հղի կնոջ, որն արդեն ութ երեխա ունի: Նրանցից երկուսը կույր են, երեքը՝ խուլ, մեկը՝ մտավոր թերզարգացած, իսկ ինքը՝ կինը, հիվանդ է սիֆիլիսով: Դուք նրան խորհուրդ կտա՞ք արդյոք աբորտ անել:
Բայց այդ հարցին պատասխանելուց առաջ նախ պատասխանե՛ք այս մյուս հարցին:
Համաշխարհային առաջնորդի ընտրություններ են անցկացվում, եւ ձեր ձայնը վճռորոշ նշանակություն ունի:
Թեկնածուների կարճ բնութագրերը.
Ա. Կապված է քաղաքական գործիչների հետ, որոնց բռնացրել են խարդախության մեջ, մշտապես խորհրդակցում է աստղագուշակի հետ, երկու սիրուհի ունի, ծխամորճ է ծխում եւ օրական 8-10 մարտինի է խմում:
Բ. Երկու անգամ հեռացրել են ծառայությունից. սովորություն ունի քնել մինչեւ կեսօր, ինստիտուտում բռնացրել են օփիում օգտագործելիս, ամեն երեկո մեկ շիշ վիսկի է խմում:
Գ. Պատերազմի հերոս, բուսակեր, հազվադեպ գարեջուր է խմում, չի ծխում, ամուսնական որեւէ կապ չի հաստատել:
Ո՞մ եք դուք ընտրում: Պատասխանեցի՞ք:
Այդ դեպքում եւս երկու խոսք թեկնածուների մասին:
Ա. Ուինսթոն Չերչիլ
Բ. Ֆրանկլին Դելանո Ռուզվելտ
Գ. Ադոլֆ Հիտլեր
Այ հիմա դուք պատրաստ եք պատասխանել առաջին հարցին: Եթե դուք խորհուրդ տվեցիք աբորտ անել, ապա դուք հենց նոր սպանեցիք Լյուդվիգ վան Բեթհովենին:
Ավագ Շաբաթվա խորհրդավոր այս օրերին ակամա մտածում ես մատնության ու լքումի, տառապանքի և խաչելության մասին: Սեփական մաշկիցդ ներս զգում ես մահվան սահմռկեցնող զորությունը և մեղքի անտանելիորեն ծանր բեռը: Սկսում ես կարեկցել դրսում, գիշերվա ցրտի և տեղատարափ անձրևների դեմ անպաշտպան մանցած ծաղկած բալենուն, գարնան կարոտ զգալ… Երկնքից արև~ խնդրել ու ՀԱՐՈՒԹՅՈՒՆ:
Հարկավոր է սպասել ևս մեկ-երկու օր, «արթուն մնալ և աղոթել», ինչպես Տերը պատվիրեց Իր առաքյալներին:
Եվ երջանկություն է գիտակցելը, որ քո սպասումի մեջ դու միայնակ չես. բյուրավոր հավատացյալներ աշխարհի տարբեր ծագերում սպասում են մարդկության պատմությունը հեղաշրջած միակ ՀՐԱՇՔԻՆ: Տեր Հիսուս նորից հարություն կառնի: Այս անգամ Արդարության Արեգակը կծագի ապրիլ 24-ին, կծագի` ջերմացնելու համար բյուրավոր անմեղ զոհերի հոգիները:
Թող Ամենազոր Աստված Իր Հրաշափառ Հարության լույսով ողողի հայոց փոքր ածուն, ուժ տա ապրելու և արարելու:
ԱՎԱԳ ՀԻՆԳՇԱԲԹԻ /ապրիլի 21/
Հիշատակ է մեր Տիրոջ` Հիսուս Քրիստոսի խորհրդավոր ընթրիքի
— 7:30 Գիշերային ժամերգություն և Կարգ ապաշխարողաց
– 10:30 Սուրբ Պատարագ
– 16:00 Ոտնլվայի կարգ` ի հիշատակ Հիսուս Քրիստոսի 12 աշակերտների ոտքերի լվացման: Արարողությունը կկատարվի Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հանդիսապետությամբ.
– 19:00 Խավարման կարգ` ի հիշատակ մեր Տիրոջ` Հիսուս Քրիստոսի մատնության:
ԱՎԱԳ ՈՒՐԲԱԹ /ապրիլի 22/
Հիշատակ է մեր Տիրոջ` Հիսուս Քրիստոսի չարչարանքների և խաչելության
– 12:00 Խաչելության կարգ
– 17:30 Թաղման կարգ: Ավարտին կկատարվի նախատոնակ, որի ընթացքում Հիսուս Քրիստոսի խորհրդանշական գերեզմանը հանդիսավոր թափորով կշրջվի Տաճարի շուրջ: Արարողությունը կհանդիսապետի Ն.Ս.Օ.Տ.Տ. Գարեգին Բ Վեհափառ Հայրապետը:
ԱՎԱԳ ՇԱԲԱԹ /ապրիլի 23/
Ճրագալույց Սուրբ Զատկի
– 17:30 Երեկոյան ժամերգություն, որին կհաջորդեն սուրբգրային ընթերցվածքներն ու Դանիել մարգարեի թուղթը, ապա կմատուցվի Ս. Պատարագ, որից հետո կկատարվի նախատոնակ:
ՍՈՒՐԲ ԶԱՏԻԿ /ապրիլի 24, կիրակի/
Հիշատակ է մեր Տիրոջ Յիսուս Քրիստոսի Հրաշափառ Հարության
— 1130 Հայրապետական Ս. Պատարագ, որի ընթացքում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Սուրբ Հարության տոնի առիթով Հայրապետական իր պատգամը կուղղի համայն հայ ժողովրդին:
— 16:30 Հոգեհանգստյան արարողություն Հայոց Ցեղասպանության անմեղ զոհերի համար
Մերի Միքայելյանի հեղինակած տեսանյութը պատմում է «Մանանա» ծրագրի մասին («Երկիր Մեդիա» հ/ը «Անկախության սերունդ» հաղորդաշար):
«ՄԱՆԱՆԱ»-ն երիտասարդական-քրիստոնեական ծրագիր է, որն իրականացվում է Հայ Առաքելական Սուրբ Եկեղեցու հոգևորականների և երիտասարդների ջանքերով:
ԸՆԹԱՑՔԸ — Ծրագրի շրջանակներում կազմակերպվում են ամենշաբաթյա հանդիպումներ հոգևորականների հետ, երիտասարդական-արդիական խնդիրների քննարկում, հարց ու պատասխան: Հաճախակի կազմակերպվում են նաև ուխտագնացություններ:
ՆՊԱՏԱԿԸ — օգնել երիտասարդներին ճանաչել Աստծուն, ծանոթանալ Հայ Առաքելական Սուրբ Եկեղեցու դավանանքին և ավանդույթներին, ինչպես նաև արդիական հարցերի վերաբերյալ արտահայտելու սեփական կարծիքը:
ՎԱՅՐԵՐ — Ծրագիրը ներկայումս իրականացվում է
1. Էջմիածնի Ս. Գայանե վանքում,
2. Էջմիածնի Ս. Հռիփսիմե վանքում,
3. Մալաթիայի Ս. Աստվածածին եկեղեցում,
4. Արգավանդի Ս. Սարգիս եկեղեցում,
5. Նոր Նորքի Ս. Սարգիս եկեղեցում,
6. Երևանի Ս. Զորավոր Աստվածածին եկեղեցում,
7. Օշականի Ս. Մեսրոպ Մաշտոց եկեղեցում
8. Երևանի Ս. Գրիգոր Լուսավորիչ Մայր եկեղեցում:
Հանդիպումները հիմնականում կազմակերպվում են եկեղեցիներին կից դահլիճներում:
ՁԵԶ ՍԻՐՈՎ ՍՊԱՍՈՒՄ ԵՆ
Տեղեկատու հեռախոսներ`
095 106-112 Սեյրան սարկավագ,
093 888-750 Արթուր սարկավագ,
055 517-365
010 517-365 Արսեն սարկավագ:
Եթե ցանկանում եք պարբերաբար տեղեկություններ ստանալ «ՄԱՆԱՆԱ» ծրագրի հանդիպումների և թեմաների մասին, միացեք Ֆեյսբուքի այս խմբին`
Մի կին երազում տեսավ՝ իբր խանութի վաճառասեղանի հետեւում ինքը՝ Տեր Աստված էր կանգնած:
ԿԱՆԹԵՂ 